2019 წლის 16 დეკემბერს აფხაზეთის ლეგიტიმური მთავრობის დელეგაციამ პეკინში "აბრეშუმის გზის საერთაშორისო თანამშრომლობის ფორუმში" მიიღო მონაწილეობა
აფხაზეთის ავტონომიური რესპუბლიკის მთავრობის დელეგაციის წარმომადგენლები აფხაზეთის მთავრობის თავმჯდომარის მოადგილის ანზორ მარგიანის (დელეგაციის ხელმძღვანელი), საერთაშორისო საკითხებში აფხაზეთის ა/რ მთავრობის თავმჯდომარის თანაშემწის ნანა გოგოხიას, ჩინეთის სახალხო რესპუბლიკაში საქართველოს სავაჭრო სამრეწველო პალატის წარმომადგენლის ბექარ მიქაბერიძის და აფხაზეთის ავტონომიური რესპუბლიკის სავაჭრო-სამრეწველო პალატის პრეზიდენტის გოგიტა თედორაძის შემადგენლობით სამუშაო ვიზიტით იმყოფებოდნენ ქ. პეკინში, სადაც მონაწილეობა მიიღეს ჩინეთის საერთაშორისო კომერციის პალატის მიერ ორგანიზებულ "აბრეშუმის გზის საერთაშორისო თანამშრომლობის ფორუმში" "(Listed Companies to Build the B&R International Cooperation Forum).
ქ. პეკინში გამართულ საერთაშორისო ფორუმში ქართული დელეგაციის მონაწილეობა ჩინეთის სახალხო რესპუბლიკაში საქართველოს საელჩოს მხარდაჭერით განხორციელდა.
ღონისძიების ფარგლებში შეხვედრები გაიმართა საერთაშორისო ვაჭრობის განვითარების ჩინეთის საბჭოს თავმჯდომარესთან გაო იანგთან, მსოფლიო სავაჭრო ცენტრების ასოციაციის პრეზიდენტ არუნ მასინგთან, ჩინეთის საერთაშორისო კომერციულ პალატასთან. შეხვედრების დროს გამოიკვეთა სამომავლო თანამშრომლობის პერსპექტივები.
ფორუმის ფარგლებში გამართულ შეხვედრებში მონაწილეობა მიიღო საქართველოს საგანგებო და სრულუფლებიანმა ელჩმა ჩინეთის რესპუბლიკაში არჩილ კალანდიამ.